Friday, December 19, 2008
ജൂണ് 04, 2006
ആദ്യം
പ്രണയമാണ് തിരിച്ചെടുത്തത്
പിന്നെ സ്നേഹം
ഒടുവില് കാമം
ഓരോന്നോരോന്നായ് എല്ലാം
അവള് തിരിച്ചെടുത്തു
എന്നെ മാറിമാറി ഊട്ടിവളര്ത്തിയ
മാറ് അവള് ബലമായി തിരിച്ചെടുത്തു
എന്നെ ചേര്ത്തുപിടിച്ചിരുന്ന
കൈകള് എടുത്തുമാറ്റി
ദൂരേക്കുമാറിനിന്നു....
ചുറ്റിപ്പിണയുമായിരുന്ന
അവളുടെ ഉടലിനിപ്പോള്
എന്നെക്കാണുമ്പോള്
അറപ്പാകുന്നു.....
എല്ലാം
തിരിച്ചെടുക്കുകയാണവള്
എന്നെയൊഴികെ മറ്റ് എല്ലാം.......!!
നിഴല് സ്വപ്നങ്ങള്
മുകളില് വിളറിയ ആകാശം
താഴെ നനഞ്ഞുകുതിര്ന്ന മരുഭൂമി
‘ ഇസ്രായേല് 21കി.മീ ‘ എന്നെഴുതിയ
മൈല്ക്കുറ്റിക്കുമുകളില്
അവനിരുന്നു, ക്രിസ്തു !!
ചോരപ്പാടുകളോ
ആണികള് ആഴ്ന്നിറങ്ങിയ
മുറിവുകളോ അവന്റെ ശരീരത്തില് ഉണ്ടായിരുന്നില്ല...
എങ്കിലും അവന് ക്രിസ്തു ആയിരുന്നു....
രാത്രി,
കുരിശിന്റെ നിഴലില് അവന് കിടന്നുറങ്ങി.
സ്വപ്നത്തില് അവന്
മഗ്ദ്ലനമറിയത്തെ കണ്ടു
പുഴക്കുകുറുകെകിടന്ന ഒരു മരക്കുരിശില് അവളിരിക്കുന്നു
കൈയ്യില് കസന് ദ സക്കിസിന്റെ
‘ ദ ലാസ്റ്റ് ടെംപ് റ്റേഷ്ന് ഓഫ് ക്രൈസ്റ്റ് ....!! ’
അവള് കരയുന്നുണ്ടായിരുന്നു
കണ്ണുനീര്ത്തുള്ളികള് ഒരു കുഞ്ഞരുവിയായി
പുഴയിലേക്കു ചേര്ന്നുകൊണ്ടിരുന്നു
പുഴനിറഞ്ഞു , കരകവിഞ്ഞു
മറിയം വെള്ളത്തില് മുങ്ങിപ്പോയി
പുഴക്കുമുകളിലൂടെ കസന് ദ സക്കിസും...
ക്രിസ്തു ഞെട്ടിയുണര്ന്നു,
തന്റെ പാദങ്ങള്ക്കരികില്
ഒരു പുസ്തകം കിടന്നിരുന്നു.....
‘ ദ ലാസ്റ്റ് ടെംപ് റ്റേഷ്ന് ഓഫ് ക്രൈസ്റ്റ് ....!! ’
അപേക്ഷ
പെണ്ണേ
നീ എന്റെ മനസ്സില് ചുവന്ന ചിത്രങ്ങള് വരക്കരുത്
വര്ഷങ്ങള്ക്കുശേഷം അവ ചിലപ്പൊള്
പ്രസിദ്ധമാവുകയും ഒരുപക്ഷേ ചിതലെടുത്തുപോവുകയും
ചെയ്തേക്കാം
പെണ്ണേ
നീ എന്റെ പാവം മനസ്സിനെ
ഒരു സിത്താറായി മാറ്റരുത്
മാസങ്ങള്ക്കു ശേഷം
സിത്താറിന്റെ ഈണക്കമ്പികളില്
വഴിയാത്രക്കാര് അലക്കുതുണികള്
വിരിച്ചേക്കാം....
പെണ്ണെ
നീ എന്റെ മനസ്സിനെ
ഒരു മഴയാക്കി മാറ്റരുത്.
പെരുമഴക്കും, വരണ്ടദിവസങ്ങള്ക്കും ശേഷം
ഞാന്
നിന്നെ
അതി ഗാഡമായി
പ്രണയിച്ചു പോയേക്കാം......
ശ്വാസം
കവിത
നിറഞ്ഞ് പോയതായിരുന്നു
ആ കണ്ണുകള് ,
പിന്നെ തിരിഞ്ഞുനോക്കാതെ ഓടി മറഞ്ഞു.....
പാതിവഴിയെത്തിയ വിളിപോലും
കേള്ക്കാന് നില്ക്കാതെ.....
ചുവന്ന റിബണുകള്
ലാല് സലാമല്ലെന്നും
കുഴിയുള്ള തടിക്കഷണങ്ങള്
വള്ളങ്ങളല്ലെന്നും ഞാന്
പ്രസംഗിച്ചു നടന്നു
ജീവിതത്തെ ചിത്രങ്ങളാക്കാന്
കാമുകിയുടെ അഭ്യര്തന !
അതിനു ജീവിതമെവിടെ എന്നു ഞാന് !
പിന്നെ വിളിക്കാന് തോന്നിയതേയില്ല.
സ്വപ്നങ്ങള്
സ്വപ്നങ്ങള് കാണാന്
എനിക്കിഷ്ട്മല്ലായിരുന്നു...
കണ്ട് കണ്ട്
ഞെട്ടിയുണര്ന്ന രാത്രികളൊന്നും
ഇപ്പൊഴും മറന്നിട്ടുമില്ല........
അമ്മ മരിക്കുന്നത്,
അച്ചന് അപകടം പിണയുന്നത്,
ഞാന് നൂല്പ്പാലത്തില് നിന്നും താഴേക്കുവീഴുന്നത്,
പിന്നെ കാമുകി ചതിക്കുന്നത്
അങ്ങനെ എത്ര ദുസ്വപ്നങ്ങള്..!!
ഇതിനിടയില്
“ ദുസ്വപ്നങ്ങള് “ എന്ന തലക്കെട്ടിലും കണ്ടു
ഒരു സ്വപ്നം
മഴ പെയ്യുന്നത്, ഇലകള് കൊഴിയുന്നത്,
മേഘങ്ങള് ഒഴുകുന്നത്,
തുമ്പികള് പാറിക്കളിക്കുന്നത് ഒന്നും
കണ്ടിട്ടുമില്ല ഞാന് .....
തുമ്പികള് , മഴ, മേഘം, ഇലകള്, പ്രണയം
പിന്നെയീ ജീവിതം..
ഇവയെല്ലാം
ഓരോ സ്വപ്നങ്ങളാണിപ്പോള്
ശേഷിക്കുന്ന
കുറേ സ്വപ്നങ്ങള് ......!!
Subscribe to:
Posts (Atom)